JALOUZI NÈG SAN KONSYANS
JALOUZI NÈG SAN KONSYANS
Lijanboje, abòdjò, wòklò ,divinò parèt
Pou l voye nan peyi tèt san chapo Menorte
Kreyati Jewova Dye te pran san l pou l fòme
Rive kouwè kout zeklè disparèt
Ochan pou tout fanm vanyan ki tonbe
Matirize, vyole, kidnape, asasine e tiye
Anba men mouche gason lijanboje
Ki pran fanm pou kalson pou drive
Mesye o, se fanm ki akouche lavi tande
An n pa kite jalouzi,
Pou nap mal aji
Menm si mezantant ta pase
Konnen ou pa gen dwa detwi
Lavi Bondye te kreye.
Si fanm te kreye pou te pwotege
Poukisa gen gason ki konvèti pou yo an danje?
Yon chan pou tout fanm ki pa gen kè kontan
Pou wè kijan yo ap disparèt kwè van
Akòz jalouzi nèga san konsyans
Ki simante nan lespwi l vyolans.
Fè kreyati sa a santi lavi l pa ansekirite
Lè l wè ki jan fanm sou latè ape tonbe
Sou chimen lanmò akòz yon gason.
Ki kite twòn kè li ap dirije de yon demon.
Fanm pa mango mi
Pou ap mache keyi l
Eske se ou kite ba li lavi
Pou ou panse ou gen dwa tiye l ?
Pa genyen fren sou wout malè
Men, poze tèt ou yon kesyon monchè
Kote ou ta va ye, souple pa bliye
Ou fè ditò a manman limanite
Sonje, lanmò se yon sèl chimen
Kote tout moun genyen pou pase
Si se pa jodi se yon demen
Men, pou kisa ou prese
Nan mache tenyen
Flanbo Bondye te limen ?
Menm si ou ta va kouri, pou ou ale kache
Nan fon-w kouwè KAYEN genyen yon so ki tanpe.
Konnen byen, pou ou tou, lanmò pap genyen pitye
Pa panse –w pral epanye anba jijman Bondye
Sèl fason, bay Jezikri laviw- e ou va sove.
Yon tèks de Hamlet Alexandre dit Jespaham 19/4/2013